Pönsur og læti

Það er búið að vera frekar brjálað að gera upp á síðkastið hjá okkur. Frá því ég bloggaði síðast er ég búinn að klára mitt síðasta próf á mínum háskólaferli (allavega í bili), pakka niður búslóðinni og senda til Íslands, fara til Málmeyjar í dagsferð, fljúga til Íslands, fá lánaðan bíl sem síðan bilaði kvöldið áður en keyra átti til Akureyrar og þaðan til Fáskrúðsfjarðar, fá lánaðan annan bíl til að keyra á austur á firði, keyra austur á Fáskrúðsfjörð, keyra aftur í bæinn viku seinna og skila bílnum, sækja búslóðina til Samskipa, koma henni í geymslu, kaupa bíl (með álfelgum), keyra austur og svo í dag bakaði ég pönnukökur. 

Sem læknisfrú er mikilvægt að kunna að baka góðar pönnukökur. Ég komst að því í dag að ég þarf að æfa mig betur þó þær hafi nú verið ágætar. Jafnvel að ég reyni að kreista út uppskriftina hennar Ömmu, en hún býr, eins og alþjóð veit, til bestu pönnukökur á Íslandi. 

Fáskrúðsfjörður er krúttlegur bær, eða le bær de le krútt eins og sagt er hér. Meira ítarefni um bæinn er væntanlegt hér á þessari síðu í sumar, fylgist með!